د شهیدانو او معلولینو چارو وزارت د کارکوونکو چارو ریاست د کارکوونکو لپاره په الکټرونیکي بڼه د تشکیلاتو د طی مراحل کولو په موخه د پوهاوي پروګرام دایر شو
د امارتي ادارو د تشکیلاتو د طی مراحل کولو په موخه د نوي رامنځته شوي الکټرونیکي سیسټم په اړه د پوهاوي پروګرام د شهیدانو او معلولینو چارو وزارت اړوند کارکوونکو ته د چارو ادارې عمومي ریاست د (HRMIS) سیسټم د برخې استازو له لوري وړاندې شو چې په ترڅ کې یې یادو کارکوونکو ته د نوي سیسټم د کارونې او عملي کولو اړوند معلومات ورکړل شول.
د پوهاوي په دې پروګرام کې د کارکوونکو د چارو رئیس محترم مولوي محمد موسی صدیقي د تشکیلاتو د طی مراحل په موخه د نوي الکټرونیکي سیسټم رامنځته کول یې د هرې ادارې لپاره مهم او ګټور ګام وباله او د پلي کېدو په برخه کې یې د هر اړخیزې همکارۍ ژمنه وکړه.
همداراز د چارو ادارې عمومي ریاست د (HRMIS)سیسټم د څانګې استازو هم د تشکیلاتو د طی مراحل په موخه د نوي رامنځته شوي الکټرونیکي سیسټم د کارونې په هکله هر اړخیز معلومات وړاندې کړل او زیاته یې کړه: یاد سیسټم داسې ډیزاین شوی چې په هغه کې د کارکوونکو د ګمارنې، ارزونې او د سوانحو درج کول په منظم او آسانه توګه ترسره کېږي، په دې سیسټم کې د هرې برخې صلاحیتونه او دندې په روښانه توګه تفکیک او واضح شوې دي، د کارکوونکو اطلاعات په محرم او مصؤن ډول ساتل کېږي او یاد سیسټم له ټولو امکاناتو څخه برخمن دی.
