د شهیدانو او معلولینو چارو وزارت د کونډو، یتیمانو او معلولینو د ملاتړ او هغوی ته د مرستو چمتو کولو په موخه د یار خیریه مؤسسې سره هوکړه لیک لاسلیک کړ
یاد هوکړه لیک د (۴۳) زره او (۸۵۰) امریکایي ډالرو په ارزښت د دې وزارت د بهرنېو اړیکو او پلان رئیس محترم ملا صدو خان حق شناس او د یار مؤسسې مرستیال محترم صدیق الله توخي ترمنځ لاسلیک شو، چې د هغه پر بنسټ به، (۹۵۰) تنو کونډو، یتیمانو او معلولینو ته په کابل او ننګرهار ولایتونو کې خوراکي مواد او همداراز د ژمنېو توکو مرستې چمتو او ووېشل شي.
محترم ملا صدو خان حق شناس د هوکړه لیک د لاسلیکولو پر مهال یتیمانو او معلولینو ته د حرفوي زده کړو د زمینې برابرولو او همداراز دکونډو لپاره د کوچنیو کارو بارونو په رامنځته کولو ټینګار وکړ، تر څو له یوې خوا د هغوی اقتصادي ستونزې حل شي او له بلې خوا یادو کسانو ته دوامدارې عایداتي سرچینې برابرې شي.
په ورته وخت کې محترم صدیق الله توخي د یادې مؤسسې د فعالیتونو او لاسته راوړنو په هکله هر اړخیز معلومات وړاندې کړل او ژمنه یې وکړه چې یتیمانو، کونډو او معلولینو ته به لا زیاتې مرستې چمتو کړي.
