د شهیدانو او معلولینو چارو وزارت د بشري سرچینو په ریاست کې د کاري بهیر د لاښه والي په موخه اداري غونډه ترسره شوه
یاده غونډه چې د بشري سرچینو رئیس محترم مولوي محمد موسی صدیقي په مشرۍ جوړه شوې وه په هغه کې د یاد ریاست د استخدام آمر محترم محمد انور سخي زاده، د سوانحو او ارزونې آمر محترم کریم الله فاروقي، د ظرفیت لوړولو او اداري پراختیا آمر محترم عزیز احمد احمدي او د یاد ریاست کارکوونکو ګډون کړی وو.
په دې غونډه کې په ۱۴۰۳ کال کې د یاد ریاست پر پلانونو، د ازموېنې کمېټې پر رامنځ ته کولو، د آنلاین او آفلاین ازموېنې لپاره د چمتووالي، د جدید التقرر کارکوونکو د کاري بهیر ارزونې، د روان کال لپاره د کارکوونکو د هویت کارتونو لپاره د کړنلارې جوړولو، د ظرفیت لوړولو لپاره د جامع پلان ترتیبولو، د بالمقطع او قراردادي کارکوونکو د قراردادونو د تجدید پر څرنګوالي او همداراز په ځېنو نورو مهمو اداري مسایلو باندې هر اړخیزې خبرې وشوې.
همداراز په یاده غونډه کې ګډونوالو خپل نظریات او وړاندیزونه غونډې ته وړاندې کړل او د محترم مولوي محمد موسی صدیقي له خوا د چارو د ښه ترسره کولو په موخه د یاد ریاست کارکوونکو ته لازمې لارښوونې او سپارښتنې وشوې.
