د شهیدانو او معلولینو چارو وزارت یو سل او شل (۱۲۰) تنو یتیمانو او معلولینو لپاره د حرفوي زده کړو عملي روزنیز پروګرامونه پیل کړل
د شهیدانو او معلولینو چارو وزارت چې د یتیمانو او معلولینو لپاره د خیاطۍ، کمپیوټر، د برښنائي وسایلو د ترمیم، د مبایلونو، جنراتورونو، یخچالونو او د موټرسایکلونو د ترمیم په برخو کې د حرفوي زده کړو پنځه میاشتنی پروګرام پیل کړی وو چي د څلور میاشتنۍ تېوري زده کړو وروسته یي نن د یوې میاشتې لپاره په یادو برخو کې عملي زده کړې پیل کړې.
هغه پروګرام چې په همدې موخه د شهیدانو ورثه ؤ او معلولینو د پالنې په مرکز کې جوړ شوی وو په هغه کې د مالي او اداري چارو عمومي رئیس محترم مولوي کلیم الله افغان، د دعوت او ارشاد رئیس محترم مفتي عبدالاحد مسعود، د مالي او حسابي چارو رئیس محترم قاري محمد امین درویش، د اطلاعاتو او عامه اړیکو رئیس محترم مفتي فیصل خاموش، د شهیدانو ورثو او معلولینو د پالنې مرکز رئیس محترم ملا رحمت الله خالد او د دې وزارت ځینو آمرینو او کارکوونکو ګډون کړې وو.
په دغه پروګرام کې د مالي او اداري چارو عمومي رئیس محترم مولوي کلیم الله افغان یتیمانو او معلولینو ته د حرفوي زده کړو د اهمیت په هکله هراړخیزې خبرې وکړې او زیاته یې کړه: د شهیدانو او معلولینو چارو وزارت هڅه کوي چې د یتیمانو او معلولینو د اقتصادي ستونزو د له منځه وړلو لپاره لازیاتې اسانتیاوې برابرې کړي چې دا به له یوې خوا دوی په ځان بسیا او له بلې خوا به د خپلې کورنۍ او ټولنې د خدمت جوګه شي.
نوموړي په دغه پروګرام کې د یاد روزنیز پروګرام زده کوونکي تشویق او وهڅول او له هغوی یې وغوښتل ترڅو هغه فرصتونه چې د شهیدانو او معلولینو چارو وزارت له لوري دوی ته برابر شوي له هغې څخه پوره ګټه پورته کړئ.
محترم مولوي کلیم الله افغان همدا راز زیاته کړه: هیله ده چې په دې موده کې به مو ډیر څه زده کړې وي او د هېواد په ابادۍ کې به یې وکاروئ، ترڅو د یو متعهد افغان او مسلمان په توګه دې هېواد ته خدمت وکړئ.
د شهیدانو ورثو او معلولینو د پالنې مرکز رئیس محترم ملا رحمت الله خالد خبرې وکړې او زیاته یې کړه: په دغه روزنیز ورکشاپ کې یو سل او شل (۱۲۰) تنه یتیمان او معلولین په بیلابیلو برخو کې په زده کړو بوخت دي، نن ورځ موږ د دې شاهدان یو چې د تیوري دورې د زده کړو وروسته د دوی لپاره یو میاشتنی عملي روزنیز پروګرام پیل شو.
د دې پروګرام په آخر کې ځینو زده کوونکو ته ډالۍ هم ورکړل شوې.
