د شهيدانو او معلولینو چارو وزارت یوه پلاوي په خوست ولایت کې د یاد وزارت اړوند ریاست کړنې او فعاليتونه په هر اړخیزه توګه وڅیړل
د یاد وزارت د معلولینو د توانبخشۍ رئيس ښاغلي مولوي عبدالنافع منتفع په مشرۍ پلاوی چې په ترکیب کې د مالي او حسابي چارو ریاست د بودیجۍ آمر ښاغلی محمد ادریس او د معلولینو چارو ریاست د تأدیاتو څانګې مدیر ښاغلی محمد عتیق شامل وو، د خوست ولایت د شهیدانو او معلولینو چارو ریاست کړنې او فعاليتونه یې په هر اړخیزه توګه وڅیړل.
یاد پلاوي یتیمانو، کونډو او معلولینو ته د میاشتنۍ نغدي مرستو د ورکړۍ څرنګوالی، اجرا شوې حوالې، بانکي راپورونه وکتل او د معلولینو او یتیمانو د میاشتنۍ نغدي مرستو د ورکړۍ په پروسه کې د روڼتیا د معلومولو په موخه یو شمېر یتیمانو او معلولیت لرونکو وګړو سره له نږدې وکتل او د هغوې څخه یې د خدمتونو د وړاندې کولو د څرنګوالي په هکله پوښتنې وکړې.
