د معلولیت ملي ستراتیژۍ مسوده باندې بحث وشو
د معلولیت ملي ستراتیژۍ مسوده باندې بحث وشو
د شهیدانو او معلولینو چارو سرپرست وزير پوهنمل حمیدالله فاروقي په مشرۍ په جوړه شوې غونډه کې، د معلولیت ملي ستراتیژي (2020-2030) باندې بحث وشو.
په پيل کې، د شهیدانو او معلولینو چارو سرپرست وزیر د معلولیت ملي ستراتیژي تر ټولو مهم ملي سند وګاڼه او زیاته یې کړه، چې په راتلونکو لسو کلونو کې ددې ستراتيژۍ د پلې کيدو په صورت کې به د معلولیت لرونکو وګړو ډیرۍ ننګونې او ستونزې حل شي.
دا ستراتیژي د اړوندو ارګانونو سره په همغږۍ او همکارۍ رامینځته شوې او په ټولنیز، سیاسي، اقتصادي، ورزشي او کلتوري برخو کې د معلولیت لرونکو وګړو ټولنيز ګډون او پیاوړتیا په برخو کې اغيزناکې او مهمې ۱۵ کاري موخې لري.
همدارنګه په کليدي سکټورونو او برنامو کې د معلولیت لرونکو وګړو شاملول، د معلولیت لرونکو وګړو ځواکمنتیا او ټولنیز ګډون او په حکومتدارۍ کې همغږي او څارنه له بنسټيزو فعاليتونو څخه دي، چې پر بنسټ يې دا ستراتیژي رامینځته شوې ده.
ټاکل شوې، چې ياده ستراتيژي به په نږدې راتلونکي کې د کابینې غونډې ته، د ولسمشر لخوا د منظورۍ په موخه وړاندې کېږي.
د یادونې وړ ده، چې په دې ناسته کې، د برنامو او همغږۍ مرستيالې صبرۍ اندړ، د ملاتړ او خدمتونو وړاندې کوونکې معاونيت مرستيالې جمیلې نورستانۍ او د وزارت نورو چارواکو ګډون درلود.
