د شهیدانو او معلولینو چارو سرپرست وزير د ختیځ زون د شهیدانو وارثینو او نظامي معلولینو له استازو سره وکتل
د شهیدانو او معلولینو چارو سرپرست وزير د ختیځ زون د شهیدانو وارثینو او نظامي معلولینو له استازو سره وکتل
د شهیدانو او معلولینو چارو سرپرست وزیر پوهنمل حمیدالله فاروقي نن د ننګرهار ، نورستان ، لغمان او کنړ ولایتونو د شهیدانو ورثې او معلولینو له استازو سره وکتل او د هغوی ستونزې او غوښتنې یې واورېدې.
په دې ناسته کې د وزارت د ملاتړ او خدمتونو وړاندې کوونکې مرستيالې جمیلې نورستانۍ، د بشري سرچینو رییس او د وزارت د څار رييسانو هم برخه اخیستې وه.
په پیل کې، د نظامي معلولینو رییس ښاغلي رحیم الله رحیمي خبرې وکړې او یادونه یې وکړه چې د ټولو ستونزو سربیره چې د ټولنې بیلابیلې برخې يې زيانمنې کړې، د شهیدانو ورثه او معلولینو په ځانګړي توګه نظامي سکتور له دې معافیت څخه معاف نه دی. ښاغلي رحیمي په ختیځو ولایتونو کې د شهیدانو ورثی او نظامي معلولینو د اسنادو د تصدیق او لوړو زده کړو زمينې برابرول، د خدمتونو وړاندې کولو بهير چټکتيا، کارموندنې، د برېښنايي پېژند پاڼو وېش، په ۱۴۰۰ هجري لمريز کال کې د معاشونو پر وخت تادیې ستونزې د ځانګړې پاملرنې وړ وګڼلې او هيله یې وکړه چې د قانون او مشخصو تګلارو سره سم د دوی اسناد چیک او تایید شي، څو خپل پاتې حقوق ترلاسه کړي.
ورپسې د ننګرهار، کنړ، نورستان او لغمان ولایتونو د معلولینو او نظامي شهیدانو ورثې استازو خبرې وکړې او د شهیدانو او معلولینو چارو وزارت کې د وروستيو اصلاحاتو او روڼتيا د ټينګښت له پروسې يې هر اړخيز ملاتړ وکړ.
ورپسې د وزارت د ملاتړ او خدمتونو وړاندې کوونکې مرستیالې آغلې جمیلې نورستانۍ، د بشري سرچینو رییس محمد اصف سهاک او د وزارت د تفتیش رییس ګل احمد عثماني خبرې وکړې او په ځواب کې یې د يادو استازو پوښتنو او غوښتنو ته د قناعت وړ ځوابونه ورکړل.
په پای کې د شهيدانو او معلولينو چارو وزير پوهنمل حميدالله فاروقي د یادو استازو ټول نظریات، غوښتنې او ستونزو له اوريدو وروسته د وزارت له اصلاحاتو پروسې څخه یې د هغوی د ملاتړ له امله مننه وکړه او ویې ویل: د رهبري هئيت د پریکړې پر بنسټ، نظامي معلولين او شهيدانو وارثينو ته به د ۱۴۰۰ کال ټول حقوق د کال په پیل کې په يو ځايي توګه تادیه شي او د پاتې کلونو معاشونه يې د اسنادو د ارزونې او کتنې کمیسیون د کار له پای ته رسیدو وروسته تاديه کېږي.
نوموړي څرګنده کړه چې ستاسو ټولې غوښتنې، ستونزې او وړاندیزونه به د وزارت له اړوندو چارواکو سره په همغږي کې جدي ونیول شي، ترڅو موږ د ملي معلولیت ستراتیژۍ سره سم ستاسو د ژوند ښه کولو لپاره غوره او لا اغیزناکې لارې چارې وپلټو.
ښاغلي فاروقي ژمنه وکړه، چې په بشپړ صداقت او اخلاص سره به موږ د جګړې قربانیانو لپاره د هغوی حقونه او امتیازات ترلاسه کولو لپاره مبارزه وکړو او د دوی غوښتنو، ستونزو او وړاندیزونو سره سم به خپلو هڅو ته دوام ورکړو.
