د معلوليت ملي ستراتيژۍ د بډاينې لپاره ګډه همغږي دوام لري
د معلوليت ملي ستراتيژۍ د بډاينې لپاره ګډه همغږي دوام لري
نن شنبه د شهیدانو او معلولینو چارو سرپرست وزير پوهنمل حمیدالله فاروقي په مشرۍ، د معلوليت ملي ستراتيژۍ د بډاینې په موخه له عامې روغتيا، د قومونو او قبايلو چارو وزارتونو، سرې مياشتې او کوچيانو د انسجام ادارو ترمنځ د همغږۍ ناسته وشوه.
په پیل کې، ښاغلي فاروقي له اړونده ادارو د همکارۍ له امله مننه وکړه وویل: معلولیت لرونکي وګړي زياتې وړتياوې لري او له بده مرغه چې تر دې دمه د دوی له وړتیاوو او ظرفیتونو څخه په سمه توګه ګټه نه ده اخيستل شوې.
دده په وینا، چې د شهیدانو او معلولینو چارو وزارت هڅه کوي، څو ددې قشر د ظرفیتونو او وړتياوو د کارولو او پياوړتيا لپاره مناسبه زمینه برابره کړي.
نوموړي زیاته کړه، وزارت ژمن دی چې له ملي او بین المللي بنسټونو سره د ګډو هڅو او همغږۍ په چوکاټ کې به د معلولیت ملي ستراتیژۍ په بډایه کولو سره، د ياد قشر وړتیاوو زياتولو او ودې لپاره ټولنه او چاپیریال چمتو کړي.
د شهیدانو او معلولینو چارو وزير ټینګار وکړ، چې اړوندې ادارې باید د يادې ستراتیژۍ د بشپړیدو او نهایی کیدو په موخه له دوي سره خپل وړانديزونه، مشورې او نظرونه شریک کړي، څو له دې لارې هر اړخيزه ستراتيژي چمتو او د پلې کيدو وړ وګرځي.
د یادو وزارتونو او ادارو استازو هم د معلولیت ملي ستراتیژۍ د بشپړيدو هرکلی وکړ او دا ستراتيژي يې د معلولیت لرونکو وګړو لپاره د لا ښې پاملرنې او ستونزو ته رسيدنې په لاره کې بنسټيز ګام وباله.
دوی ژمنه وکړه، چې د يادې ستراتيژۍ د بډاينې او پلې کولو لپاره به د شهيدانو او معلولينو چارو وزارت سره په ګډه کار کوي او د اړونده چارو د ترسراوي راپور به هم د وزارت له مشرتابه سره شريکوي.
