د معلولیت لرونکو وګړو د نړیوالې ورځې نمانځل به نوې همکارۍاو فرصتونه رامنځته کړي
د شهیدانو او معلولینو په چارو کې د دولت وزیر ښاغلي لعل الدین آریوبي د تخنیکي او مسلکي زده کړو ادارې معین او یو شمېر رییسانو سره وکتل.
ښاغلي آریوبي د معلولیت لرونکو وګړو په برخه کې د تخنیکي او مسلکي زده کړو ادارې هڅې وستایلې او د بریل لیک مطبعې د فعالولو په موخه یې خپل نظرونه شریک کړه. همدا راز، د معلولیت لرونکو وګړو ملي انستیتیوت د فعالولو پر طرحه هم د خبرو ترڅنګ وړاندیز وکړ، چې د معلولیت لرونکو وګړو د نړیوالې ورځې په پار د دې قشر لپاره ټولې لازمې اسانتیاوې برابرې شي.
د تخنیکي او مسلکي زده کړو اداري معین ښاغلي حمید اکبر وویل، چې د شهیدانو او معلولینو په چارو کې د دولت وزارت تر څنګ د تخنیکي او مسلکي زده کړو اداره چمتو ده، چې د معلولیت لرونکو وګړو د ښوونې او روزنې په موخه د ځانګړو تعلیماتو مرکزونه جوړ کړي.
د یادونې وړ ده، چې د یادو چارو د عملي کولو لپاره د شهیدانو او معلولینو په چارو کې د دولت وزارت په مشرۍ ګډ کمېسیون جوړ شو او دا کمېسیون به د یوه حقوقي مېکانېزم له ترتیبولو وروسته ټولې خواوې د یادو چارو په ترسراوي کې مسولې وګني.
