د ښځو نړيواله ورځ ونمانځل شوه
د ښځو نړيواله ورځ ونمانځل شوه
د شهیدانو او معلولینو چارو وزارت د جنډر آمريت او د ښځو پروړاندې د تاوترېخوالي د مخنیوي ایتلاف په همکارۍ نن د یکشنبې په ورځ د کب په ۲۴تمه په کابل سټار هوټل کې د ښځو نړيواله ورځ ونمانځل شوه.
په دغه نمانځغونډه کې ویناوالو د ښځو پر وړاندې د شته ننګونو، ستونزو او فرصتونو په اړه خبرې وکړې او د افغان میرمنو لپاره يې د حقونو او بشري ارزښتونو په ترلاسه کولو ټينګار وکړ.
د شهیدانو او معلولینو چارو وزارت د جنډر سلاکارې اغلې صفیې صدیقي لومړی د ښځو نړيوالې ورځې په ویاړ ټولو افغان ميرمنو ته مبارکي وويله، په دې هکله په جوړو شويو مراسمو کې يې د هغوی له ګډون څخه مننه وکړه او زياته يې کړه، ډېر د وياړ ځای دی چې افغان ميرمنې له محدودیتونو سره سره بيا هم تسليم نه شوې او په ناسته کې يې په خورا ليوالتيا ګډون وکړ.
د آغلې صديقي په خبره، چې اوس هم میرمنې باید د خپلو حقونو لپاره مبارزه وکړي، د بریالیو میرمنو تجربې وکاروي او د هیواد په پرمختګ کې رغنده برخه واخلي.
نوموړې د معلوليت لرونکو ميرمنو په هکله د شهيدانو او معلولينو چارو وزارت د پلانونو او برنامو یادونه وکړه او هغوی ته يې د معیاري خدماتو وړاندې کولو په برخه کې د لاسنیوي او همکارۍ ډاډ ورکړ.
د بشري حقونو خپلواک کمیسیون پخوانۍ مشرې میرمن سیما ثمر د وينا پر مهال وویل: د مارچ اتمې (د ښځو نړيواله ورځ) نمانځل دا معنی لري، چې د ښځو پر وړاندې د موجودو ستونزو، خنډونو او ننګونو یادونه وکړو او په ګډه يې د هواري لپاره هلو ځلو ته دوام ورکړو.
همدارنګه د بشري حقونو د خپلواک کمیسیون کمیشنرې، میرمن بنفشه یعقوبي هم په ټولو دولتي او غیر دولتي ادارو کې د میرمنو پر عادلانه ګډون ټینګار وکړ.
د نمانځغونډې په وروستۍ برخه کې د تیاتر ګروپ ممثلينو د افغان میرمنو ژوند په انځوريزه بڼه تمثيل کړ او د هغوی د قربانیو او سرښندنو يادونه يې وکړه.
په پای کې معلولیت لرونکو او بریاليو وګړو د خپل ژوند تجربې د غونډې له ګډونوالو سره شریکې کړې او د ښځو په تړاو يې په ګډ کار، مبارزې، همکارۍ او همغږۍ ټینګار وکړ.
