د شهیدانو او معلولینو چارو په وزارت کې پر (۵۰۰) تنو مستحقو کسانو باندې مرستې ووېشل شوې
د شهیدانو او معلولینو چارو وزارت د یتیمانو، کونډو او معلولیت لرونکو وګړو د ملاتړ او لاسنیوی او د هغوی د ورځنیو اړتیاوو د پوره کولو په موخه د نداء الخیر مؤسسې سره په همغږۍ پر (۵۰۰) تنو مستحقو یتیمانو، کونډو او معلولینو باندې د خوراکي توکو مرستې چې په هغه کې اوړه، غوړي، وریجې او نور خوراکي مواد شامل وو، په منظم او عادلانه ډول ووېشل.
د یادو مرستو د وېش پر مهال د ټولنیزو خدمتونو د تنظیم رئیس محترم مولوي علاؤالدین سعد، د کابل ولایت د شهیدانو او معلولینو چارو رئیس محترم ملا شیر محمد صمیم، د ټولنیزو خدمتونو د تنظیم آمر محترم صفي الله سدید، د څارنې او ارزونې ریاست استازي او د خیریه مؤسسې مسؤلینو شتون درلود.
د یادونې وړ ده، هغو کسانو چې مرستې ترلاسه کړې وې، (۳۰۰) تنه یې د کابل ولایت د بېلابېلو ولسوالیو اوسېدونکي، همداراز پاتې (۲۰۰) تنه نور، د کابل ښار د ناحیو اړوند یتیمان، کونډې او معلولین وو.
