د شهیدانو او معلولینو چارو وزارت د دعوت او ارشاد ریاست د دې وزارت له اړوندو کارکوونکو څخه د عقيدتي او فقهي مسایلو ازموینه واخیستله
د شهیدانو او معلولینو چارو وزارت د دعوت او ارشاد ریاست له لوري د دې وزارت کارکوونکو ته د دیني مسائلو د زده کړې په برخه کې یو منظم تدریسي پروګرام پېل شوی وو، چې په هغه کې اړوند کارکوونکو ته د عقیدتي او فقهي مسائلو په برخو کې زده کړې ورکړل شوې وې، نن د هغوی څخه په تقریري او تحریري بڼه ازموینه واخیستل شوه.
د ازموینې د اخیستلو پر مهال د دې وزارت د دعوت او ارشاد رئیس محترم مفتي عبدالاحد مسعود وویل: د الله تعالی جل جلاله په فضل او کرم په هېواد کې اسلامي نظام حاکم شوی او له نېکمرغه د اسلامي امارت مشرتابه د کارکوونکو د سمې لارښوونې او هغوی ته د دیني زده کړو په موخه په ټولو وزارتونو او ادارو کې د دعوت او ارشاد ریاستونه رامنځته کړي تر څو هغوی ته په عقیدتي، فقهي او نورو دیني مسایلو کې اړینې او ګټورې زده کړې ورکړل شي او د دې وزارت د دعوت او ارشاد رياست هم په دې برخه کې ښې لاسته راوړنې درلودلي دي.
همداراز د دې وزارت د بشري سرچینو رئیس محترم مولوي محمد موسی صدیقي هم د دیني زده کړو پر اهمیت او ارزښت خبرې وکړې او زیاته یې کړه: په ټولنه کې هر وګړي ته د دیني تعلیماتو زده کول او رسول زموږ او تاسې ګډ مسؤلیت دی، او د دیني او عصري علومو تر ټولو ښه او مؤثقه سرچینه قرآن عظیم الشان دی، دا سپېڅلی کتاب د انسانانو د ژوند لارښود دى او موږ باید هغه د ژوند د پرمختګ لپاره یوه ښه بیلګه وګرځوو او پر احکامو یې عمل وکړو.
د یادونې وړ ده چې یاده ازموینه د کارمندانو څخه په تحریري بڼه او د هغو خدماتي کارکوونکو څخه په لیک او لوست نه پوهیده په شفاهي(تقریري) ډول واخیستل شوه.
هغه ګډونوال چې په دې ازموينه کې لوړۍ نمرې ترلاسه کړي د شهيدانو او معلولینو چارو وزارت د رهبرۍ له لوري به هغوی وستایل شي.
