د معلولیت ملي ستراتېژۍ کې معلولینو لپاره د کاری فرصتونو او ټولنیز خوندیتوب مسایلو باندې بحث وشو
د معلولیت ملي ستراتېژۍ کې معلولینو لپاره د کاری فرصتونو او ټولنیز خوندیتوب مسایلو باندې بحث وشو
د شهیدانو او معلولینو چارو سرپرست وزیر پوهنمل حمید الله فاروقي د معلولیت ملي ستراتېژۍ کې معلولینو لپاره د کاري فرصتونو پراختیا او ټولنیز خوندیتوب په اړه د بحث او نظرونو شریکولو په موخه د ځینو ادارو مسولینو سره ناسته وکړه.
ښاغلي فاروقي د معلولیت د لس کلنې ملي ستراتېژۍ د بشپړولو برخه کې د جمهور رییس د لارښوونو تطبیق ته په اشارې وویل: په دې اړه وړاندې هم بحثونه شوي دي او ټولو اړوندو ادارو پکې کډون درلود. مهمه ده، چې د ټولو ادارو له نظرونو اخیستو وروسته ستراتېژي نهایي او په ۱۴۰۰ مالي کال کې یې د تطبیق چارې پیل شي.
ښاغلي فاروقي څرګنده کړه، چې ټولې ادارې باید خپل نظرونه د ټولنې د شته واقعیتونو پر بنسټ په لیکلې بڼه د وزارت مسولینو سره شریک کړي تر څو په ستراتېژۍ کې ځای پر ځای شي.
ښاغلي فاروقي معلولیت لرونکو وګړو ته د کاري فرصتونو او ټولنیز خوندیتوب مسایل مهم وګنل وویل، چې په دې برخه کې باید د معلولینو ټولې غوښتنې، ستونزې او وړاندیزونه په ښه ډول منعکس شي تر څو سمه رسیدګي ورته وشي. زیاته یې کړه چې د دې ستراتېژۍ اساسي موخه پر خپلو پښو د معلولینو درول او اقتصادي پیاوړتیا ده. اړینه ده، چې د دیني، اخلاقي او ارزښتي اصولو پر بنسټ د معلولینو ملاتړ وشي او د ستراتېژۍ د نهایي کېدو هڅې چټکې شي.
ښاغلي فاروقي د ټولو همکارو ادارو او بنسټونو مننه وکړه، چې د یوې غوره همغږۍ پر بنسټ عمل کوي او د معلولیت لرونکو وګړو ستونزو ته د رسیدګي برخه کې ځانګړې لېوالتیا لري.
د ادارو مسولینو د ستراتېژۍ د پیاوړتیا په موخه خپل نظرونه د وزارت رهبرۍ سره شریک کړل او ژمنه یې وکړه، چې د ستراتېژۍ د نهایي کېدو لپاره بشپړ تعهد لري.
