د شهیدانو او معلولینو چارو وزارت مرستیال محترم شیخ صاحب عبدالحکیم حقاني د کار او ټولنیزو چارو وزارت له مرستیال سره وکتل
د شهیدانو او معلولینو چارو وزارت مرستیال محترم شیخ صاحب عبدالحکیم حقاني نن ماسپښین په خپل کاري دفتر کې د کار او ټولنیزو چارو وزارت له مرستیال محترم الحاج مولوي عبیدالله امین زاده او راغلي پلاوي سره لیدنه وکړه، په دې لیدنه کې د شهیدانو چارو رئیس محترم مولوي روح الله نصرت او د معلولینو چارو رئیس محترم مولوي شاه ولي مسافر هم حضور درلود.
په پیل کې محترم شیخ صاحب عبدالحکیم حقاني د یتیمانو، کونډو او معلولینو د ملاتړ او د هغوی لپاره د خدمتونو وړاندې کولو د څرنګوالي په هکله خبرې وکړې او زیاته یې کړه چې د شهیدانو او معلولینو چارو وزارت په ټول هېواد کې د یادو قشرونو لپاره د میاشتني نغدي مساعدتونو د وېش مسؤلیت پر غاړه لري، په همدې موخه دغه وزارت په مرکز او ولایتونو کې هر کال د یتیمانو، کونډو او معلولینو کورونه له نږدې سروې او مشاهده کړي، هغه کسان چې د وزارت له منظور شوې طرحې مطابق وو، د هغوی لپاره یې میاشتني نغدي مساعدتونه حواله کړي دي.
د شهیدانو او معلولینو چارو وزارت مرستیال ټینګار وکړ چې د دواړو وزارتونو ترمنځ اغېزمنه همغږي کولای شي د خدمتونو کیفیت لا ښه او پراخ کړي په همدې موخه یې له مقابل لوري وغوښتل چې د هغو یتیمانو لیستونه چې د کار او ټولنیزو چارو وزارت تر پالنې لاندې دي، د شهیدانو او معلولینو چارو وزارت سره شریک کړي، څو د مشاهدې وروسته هغه کسان چې د نغدي مساعدتونو طرحې له شرایطو سره برابر وي، له میاشتني نغدي مساعدتونو څخه برخمن شي.
په ورته وخت کې د کار او ټولنیزو چارو وزارت مرستیال د مرکز او ولایتونو په کچه د ثبت شویو یتیمانو او معلولینو د پالنې په اړه معلومات وړاندې کړل او د دواړو وزارتونو ترمنځ یې د همکارۍ پر دوام ټینګار وکړ، نوموړي ډاډ ورکړ چې د یادو کسانو لیستونه به د شهیدانو او معلولینو چارو وزارت سره شریک کړي، څو د واقعي مستحقینو د پېژندنې او ملاتړ پروسه لا منسجمه او چټکه پر مخ ولاړه شي.
