د شهیدانو او معلولینو چارو سرپرست وزیر په کابل کې د ترکیې هیواد له سفیر سره وکتل
د شهیدانو او معلولینو چارو سرپرست وزیر ښاغلي ملا عبدالمجید آخوند په کابل کې د ترکیې هیواد له سفیر ښاغلي جهاد آرګین آی او مل پلاوي سره په خپل کاري دفتر کې وکتل.
په پیل کې د ترکیې سفیر ښاغلي جهاد آرګین آی د افغانستان له خلکو سره د ترکیې دولت د بشري مرستو یادونه وکړه او زیاته یې کړه: د ترکیې هېواد د اسلامي امارت د نظام د رامنځته کیدو وروسته د دغه هېواد له اړمنو خلکو سره په بېلابېلو برخو کې په ځانګړې توګه د روغتیا او خوراکي توکو د رسولو په برخو کې لازمې مرستې کړې دي چې د یادو مرستو څخه معلولیت لرونکي وګړي، کونډې او یتیمان هم برخمن شوي دي.
په دې کتنه کې د شهیدانو او معلولینو چارو وزارت سرپرست وزیر ښاغلي ملا عبدالمجید آخوند د ترکیې هېواد د بشردوستانه مرستو څخه مننه وکړه او زیاته یې کړه: په دغه هېواد کې څلویښت کلنې جګړې افغانستان د بدبختیو په مرکز بدل کړی دی، هغه د افغانستان له خلکو سره د ترکیې د مسلمان ملت د اوږدو فرهنګي او اسلامي اړیکو یادونه وکړه. همدارنګه د یاد وزارت سرپرست وزیر ښاغلي ملا عبدالمجید اخوند د ترکیې هیواد له سفیر سره په کتنه کې د یتیمانو او معلولینو لپاره د پوهنې، روغتیا او خوراکي توکو د برابرولو غوښتنه وکړه.
