د شهيدانو ورثې او معلوليت لرونکو وګړو لپاره د زده کړو زمينې برابرول مو کاري لومړيتوب دی
د شهيدانو ورثې او معلوليت لرونکو وګړو لپاره د زده کړو زمينې برابرول مو کاري لومړيتوب دی
نن سه شنبه د غبرګولي په ۴مه، د شهيدانو او معلولينو چارو سرپرست وزير د معلولينو فرهنګي او پراختيايي موسسې مشر په ګډون د معلولينو له يو شمیر استازو سره وليدل او د هغوی ستونزې، غوښتنې او وړانديزونه يې واوريدل.
د ناستې په پيل کې د معلولينو فرهنګي او پراختيايي موسسې مشر عزيزالله راسخ د معلوليت لرونکو وګړو پر وړاندې د شته خنډونو؛ د حقوقو ځنډ، کارموندنې، کاري غرفو ويش، فزيکي لاسرسي، زده کړو، ټولنيز ادغام، سرپناه او اشتغال زايي ستونزو يادونه وکړه او د وزارت له مشرتابه څخه يې د حل او همکارۍ غوښتنه وکړه.
د معلوليت لرونکو وګړو نورو استازو هم په مرکز او ولايتونو کې د شته ستونزو د هواري هيله څرګنده کړه او په دې برخه کې يې له خپله اړخه د وزارت سره د همغږۍ او ګډکار ژمنه وکړه.
د شهيدانو او معلولينو چارو سرپرست وزير پوهنمل حميدالله فاروقي وزارت ته د دوی د راتګ او ستونزو شريکولو له امله مننه وکړه او د يادو ستونزو د هواري پر وړاندې يې د حوصله مندۍ، همغږۍ او ګډکار سپارښتنه وکړه.
د نوموړي په خبره، چې په افغانستان کې د معلولينو په ګډون ۲۸ قشرونه ژوند کوي او هر قشر له خورا ستونزو سره لاس او ګريوان دي، کوم چې دا ټولې بدبختۍ او ستونزې په هېواد کې د اوږدې او خونړۍ جګړې زيږنده ده.
ښاغلي فاروقي زياته کړه، چې د وزارت رهبري هييت له شته محدودو امکاناتو او سرچينو په اعظمي ګټې اخيستنې سره په پوره ژمنتيا او ريښتينولۍ هڅه کوي، تر څو د شهيدانو ورثې او معلوليت لرونکو وګړو ستونزې د روڼتيا په رڼا کې حل او ورته د ژوند اسانتياوې بربرې کړي.
ښاغلي فاروقي څرګنده کړه، چې د شهيدانو ورثې او معلوليت لرونکو وګړو لپاره د زده کړو زمينې برابرول د وزارت له کاري لومړيتوبونو څخه دي او په دې برخه کې يې په هېواد دننه او بهر کې د زده کړو فرصتونو د موندلو لپاره پراخې هڅې روانې کړې دي.
