د امریکا په فلوریډا ایالت کې د جولای شلمه نېټه د عباس کریمي په نوم نومول شوې
د عباس کريمي اتلولي، هېوادوالو او په ځانګړي توګه په دې خاوره کې معلولیت لرونکو وګړو لپاره د خوښۍ او ویاړ ځای دی.
د امریکا د فلوریډا ایالت په فورټ لاډرډل ښار کې چارواکو په دې وروستیو کې د جولای شلمه د عباس کریمي د اتلولۍ په ملاتړ ونمانځله، دا د امریکا یو له خورا نامتو ښارونو څخه دی چې د لامبو نړیوالې سیالۍ پکې ترسره کېږي.
عباس کریمي 22 کلن افغان لامبو وهونکی ځوان دی چې په بامیانو کې له لاسونو پرته زېږېدلی دی، کریمي د لاسونو نه لرلو سره سره، په څو ملي او نړیوالو د لامبو په سیالیو کې لومړی ځای خپل کړی ده.
ښاغلي کریمي، په ملي او نړیواله کچه د بې ساري اتلولۍ او هلو ځلو سره ثابته کړه چې معلولیت د پرمختګ او اتلولۍ مخه نشي ډب کولای.
له ډېرو کلونو را په دېخوا، ښاغلی کریمي د ورزشکارانو او معلولیت لرونکو وګړو تر منځ د اتلولۍ او بریا یوه بېلګه ګرځیدلې، او په ملي او نړیوالو سیالیو کې د هغه بریا نورو ته الهام ورکوي.
د شهیدانو او معلولینو چارو وزارت ښاغلي عباس کریمي ته د دې لوی لاسته راوړنې له امله مبارکي وویله او د امریکا د فلوریډا ایالت په فورټ لاډرډل ښار کې چارواکو د جولای شلمه د عباس کریمي د اتلولۍ په ملاتړ له نمانځلو مننه وکړه.
د شهیدانو او معلولینو چارو وزارت د ملي اتلانو په ملي او نړیوالو سیالیو کې اتلولي او لاسته راوړنې په پام کې نیسي او ملاتړ یې کوي.
