ټولګټو تاسيساتو ته فزيکي نه لاسرسی د شهيدانو ورثې او معلوليت لرونکو وګړو عمده ستونزه ده
ټولګټو تاسيساتو ته فزيکي نه لاسرسی د شهيدانو ورثې او معلوليت لرونکو وګړو عمده ستونزه ده
نن سه شنبه د مرغومې په ۱۶مه، د شهيدانو او معلولينو په چارو کې د دولت وزير لعل الدين آريوبي د ښار جوړولو او ځمکو وزير سره وکتل.
د شهيدانو او معلولينو په چارو کې د دولت وزير لعل الدين آريوبي، د ښار جوړولو او ځمکو وزير ښاغلي محمود کرزي سره د شهيدانو ورثې او معلوليت لرونکو وګړو لپاره د استوګنځيو نشتون او ټولګټو تاسيساتو ته د هغوی فزيکي نه لاسرسي ستونزې شريکې کړې.
په پيل کې لعل الدين آريوبي د معلوليت ملي ستراتيژۍ، د عمل پلان او په هغو کې د ښار جوړولو او ځمکو وزارت په ونډه رڼا واچوله وويل: د شهيدانو وارثينو او معلولينو لپاره د استوګنځيو نشتون، ټولګټو تاسيساتو ته د هغوی نه لاسرسی او دې ستونزو ته د مناسبې حللارې موندل د معلوليت ملي ستراتيژۍ بنسټيز بحثونه دي.
ښاغلي آريوبي زياته کړه، چې که څه هم يادو ستونزو ته رسېدنه د ټولو دولتي ادارو ګډ کار دی؛ خو د ښار جوړولو او ځمکو وزارت پکې ځانګړی مسووليت لري.
آريوبي څرګنده کړه، چې له قانون سره سم په استوګنو اپارتمانونو او ټولنيزو اسانتياوو کې د شهيدانو وارثانو او معلوليت لرونکو وګړو لپاره اووه سلنه سهم په پام کې نيول شوی دی او د نظامي شهيدانو ورثه او معلولين د سرپناه په برخه کې لومړيتوب لري؛ خو لا هم دې موضوع ته بنسټيزه رسيدنه نه ده شوې.
د نوموړي په خبره، چې د هغو هوکړه ليکونو له مخې چې له دولتي او غير دولتي ادارو سره لاسليک شوي، هره اداره مسووليت لري چې د شهيدانو وارثينو او معلوليت لرونکو وګړو لپاره په بېلا بېلو برخو کې معياري خدمتونه وړاندې کړي.
ښاغلي آريوبي وويل: چې د معلوليت ملي ستراتيژۍ له مخې، چې د راتلونکو لسو کلونو لپاره د شهيدانو او معلولينو په چارو کې د دولت وزارت له خوا جوړه شوې ده، د ښارګوټو جوړول او ټولګټو تاسيساتو ته د معلولينو فزيکي لاسرسی ددې ستراتيژي له لومړيتوبونو څخه دي.
د ښار جوړولو او ځمکو وزير ښاغلي محمود کرزي د شهيدانو ورثې او معلولينو په تړاو د خپلو مسوليتونو يادونه وکړه وويل: هغه برنامې او اوږدمهالي پلانونه چې د شهيدانو ورثې او معلولينو، په ځانګړي ډول د نظاميانو لپاره يې د ښارګوټو او سرپناه په برخو کې لرو، کوم چې په تړاو يې له دفاع، کورنيو چارو وزيرانو او د ملي امنيت له مشرتابه سره د مسلسلو ناستو په بهير کې مو یې په ځلونو يادونه هم کړې او د ټولو اړوندو چارو ادرس چې د شهيدانو او معلولينو په چارو کې د دولت وزارت دی، له دوی سره به په ګډه يادو ستونزو ته مناسبه حللاره ومومو.
ښاغلي کرزي زياته کړه، چې د ښار جوړولو وزارت په نوې نقشه کې د قانون سره سم د شهيدانو ورثې او معلوليت لرونکو وګړو لپاره اووه سلنه سهميه په پام کې نيولې او موږ هڅه کوو چې د چاپيريال ساتنې ادارې په همکارۍ د معلولوليت لرونکو وګړو د اوسيدنې ساحې د غير معلولينو وګړو په ساحو کې مدغم کړو، تر څو د چاپيريالي تبعيض او توپيري چلند مخه ونيول شي.
د ناستې په پای کې پرېکړه وشوه، چې د عمل پلان د تطبيق په موخه به د دواړو وزارتونو ترمنځ تخنيکي کميټه جوړېږي او له همدې لارې به اړونده چارې تعقيبېږي.
