د ترکیې هېواد د هلال احمر خیریه بنسټ لخوا پر پنځه اویا معلولیت لرونکو وګړو باندې ویلچرونه وویشل شول
په هغه غونډه کې چې په همدې موخه د شهیدانو او معلولینو چارو په وزارت کې جوړه شوې وه، د شهیدانو او معلولینو چارو وزارت سرپرست وزیر ښاغلي ملا عبدالمجید آخند، د یاد وزارت مرستیال شیخ صاحب عبدالحکیم حقاني، د ترکیې هېواد سفیر ښاغلي جهاد آرګین آی، او د نوموړي وزارت ځینو رئیسانو ګډون درلود.
په پیل کې د شهیدانو او معلولینو چارو وزارت سرپرست وزیر ښاغلي ملا عبدالمجید آخند د یتیمانو او معلولینو پر وړاندې د پرتو ستونزو او ننګونو په هکله خبرې ورکړې او زیاته یې کړه: زیات شمېر معلولیت لرونکي وګړي په هېواد کې له ګڼو ستونزو سره مخ دي. نوموړي د ترکیې هېواد د سفیر څخه وغوښتل ترڅو فلجیانو ته د روزنې او تداوي په برخه کې او همدارنګه معلولیت لرونکو وګړو لپاره د پرمختللو مصنوعي پښو د جوړونۍ زمینه برابره کړي.
په کابل کې د ترکيې سفیر جهاد آرګین آی په افغانستان کې د ترکیې هېواد د شویو مرستو په اړه خبرې وکړې ویې ویل: د ترکیې هیواد د افغانستان خلکو لپاره په بیلابیلو برخو کې زیاتې مرستې کړي دي. نوموړي زیاته کړه: د مرستو څو ریل ګاډي چې په هغې کې خوراکي، روغتیايي، البسه او همدارنګه ویلچرونه شامل دي افغانستان ته لیږدول شوي دي. نوموړي همداراز کونډو ته دحرفوي زده کړو د زمینې د برابرولو یادونه وکړه او ویې ویل: په دې سره به کونډې وکولې شي تر ډیره حده خپلې اقتصادي ستونزې حل کړي.
ښاغلي آرګین آي تیره ورځ له زرو بیوزلو کورنېو سره د مرستې د یادونې تر څنګ د مرستو پر تداوم هم ټینګار وکړ.
په دې غونډه کې د شهیدانو او معلولینو چارو وزارت مرستیال شیخ صاحب عبدالحکیم حقاني هم د ترکیې هېواد د مرستو څخه مننه وکړه او زیاته یې کړه: د اسلامي امارت له راتګ سره سم په هېواد کې (۱۴۵) زره معلولین ثبت شوي دي چې د هغې جملې څخه یولک معلولیت لرونکو وګړو ته (۱۳۵) زرو یتیمانو او همدارنګه (۳۴) زرو کوڼدو ته حقوق ورکړل شوي دي.
نوموړي زیاته کړه : په تیر یو کال کې د خوراکي او غیر خوراکي توکو تر څنګ (۳۵۰) معلولیت لرونکو وګړو ته ویلچرونه هم ویشل شوي دي همدارنګه هغه د مرستو د ویش په لړۍ کې د شفافیت ډاډ ورکړ.
ښاغلي شیخ صاحب عبدالحکیم حقاني پر نړیوالو مرستندویه بنسټونو غږ وکړ چې په دې ناوړه اقتصادي وضعیت کې د دې مظلوم قشر( معلولیت لرونکو وګړو، کونډو او یتیمانو) لاسنیوې وکړي.
په یاده غونډه کې د دعوت او ارشاد رئیس ښاغلي مفتي عبدالاحد مسعود هم د ترکیې د هلال احمر خیریه بنسټ له مرستو څخه مننه وکړه او له خیریه بنسټونو څخه یې وغوښتل تر څو معلولیت لرونکو وګړو، کونډو او یتیمانو سره خپلې مرستې جاري وساتي.
د غونډې په پای کې د پلان او همغږۍ رئیس ښاغلي سید محمد عظیم آغا د معلولیت لرونکو او یتیمانو پر وړاندې د پرتو ستونزو او ننګونو یادونه وکړه او ویې ویل: پر نړیوالو هېوادونو غږ کوو تر څو د افغانستان کنګل شوې پیسۍ بیرته را وګرځوي.
