د شهیدانو او معلولینو چارو وزارت د مالي او اداري چارو عمومي رئیس د ښاروالۍ د عوایدو له رئیس سره وکتل
د شهیدانو او معلولینو چارو وزارت د مالي او اداري چارو عمومي رئیس محترم مولوي کلیمالله افغان، د ښاروالۍ د عوایدو له رئیس محترم مفتي شرافت سره لیدنه وکړه. په دې لیدنه کې د مالي او حسابي چارو رئیس محترم مولوي محمد امین دروېش او د بودجې آمر محترم قاری محمد ادریس هم حضور درلود.
په پیل کې محترم مولوي کلیمالله افغان د ښاروالۍ د عوایدو رئیس او ورسره مل پلاوي ته ښه راغلاست وویل او د هېواد د آبادۍ او ښاري نظم په برخه کې یې د ښاروالۍ هڅې او فعالیتونه وستایل.
په دې لیدنه کې په ولایتونو کې د شهیدانو او معلولینو چارو ریاستونو له لوري د ښاروالۍ اړوند د پخوانیو پاتې حسابونو او مقروضیتونو د تصفیې په اړه خبرې وشوې.
د ښاروالۍ د عوایدو رئیس محترم مفتي شرافت د شهیدانو او معلولینو چارو وزارت له لوري د اړوندو مالي باقیاتو د بشپړې تصفیې له امله خوښي څرګنده کړه او ویې ویل چې د شهیدانو او معلولینو چارو وزارت هغه یواځینی وزارت دی چې خپل پاتې حسابونه او مقروضیتونه یې په بشپړه توګه تصفیه کړي دي.
