۲۰۰ تنه معلولیت لرونکي وګړي او د شهیدانو کورنۍ غړي له يو کلنو حرفوي زده کړو څخه فارغ شول
۲۰۰ تنه معلولیت لرونکي وګړي او د شهیدانو کورنۍ غړي له يو کلنو حرفوي زده کړو څخه فارغ شول
د افغان معلولینو لپاره د لاسرسي مؤسسې(AOAD) ۲۰۰ افغان معلولیت لرونکو وګړو، د شهیدانو ورثينو، د جګړې قربانیانو او له جګړو اغیزمنو وګړو ته، چې ۸۰ تنې ښځینه او ۱۲۰ تنه نارینه پکې شامل وو، یو کلنۍ حرفوي زده کړې ورکړې.
د فارغینو په مناسبت رابلل شوې غونډه کې، د شهیدانو او معلولینو په چارو کې د دولت وزارت مرستیالې جميلې نورستانۍ، د معلولینو په چارو کې د ولسمشر سلاکار عمرا خان منیب او ددې وزارت نورو کارکوونکو هم ګډون کړی و.
آغلې نورستانۍ د معلولینو لپاره د لاسرسي مؤسسې له مشرتابه او کارکوونکو څخه مننه وکړه، چې د شهیدانو کورنیو او معلولیت لرونکو وګړو ته يې د تل په څېر يو ځل بيا هم د زده کړو زمینه برابره کړه.
د نوموړې په خبره، چې د شهيدانو او معلولينو په چارو کې د دولت وزارت هڅه کوي، تر څو معلولیت لرونکو وکړو او د شهیدانو ورثينو ته د کاري فرصتونو تر څنګ، د غوره زده کړو اسانتیاوې هم برابرې کړي.
آغلې نورستانۍ وويل، چې څه موده وړاندې مو د کابينې نهو وزارتونو سره مو بیا هغه هوکړه لیکونه تازه کړل، چې هر وزارت به په خپله کاري برخه کې د معلولیت لرونکو وګړو او د شهیدانو کورنیو ته د خدمتونو په وړاندې کولو کې همکاري کوي.
دا زياتوي، چې د شهیدانو ورثینو او معلولیت لرونکو وګړو لپاره د تحصيلي بورسونو برابرول، ٪۳ معلولیت لرونکي وګړي په بېلابېلو ادارو کې ځای پر ځای کول او ۵۰۰ بستونه د شهیدانو ورثینو او معلولیت لرونکو وګړو ته ځانکړي کول د همدې هوکړه لیکونو مهمي برخې تشکيلوي.
د معلولینو په چارو کې د ولسمشر سلاکار عمرا خان منیب هم د افغان معلولینو لپاره د لاسرسي مؤسسې فعالیتونه او کارونه وستایل او له يادې مؤسسې يې د لا زياتو خدمتونو ترسره کولو غوښتنه وکړه.
د افغان معلولينو لپاره د لاسرسي مؤسسې (AOAD)، مشر عبدالخالق ځاځي د معلوليت لرونکو وګړو لاسنيوی خپل مسوليت وګاڼه او ژمنه يې وکړه، چې، په راتلونکې اوونۍ کې به د ۲۰۰ تنو نورو معلولیت لرونکو وګړو او د شهيدانو کورنيو غړو لپاره به يو کلنی حرفوي زده کړو پروګرام پيل کړي.
