د شهیدانو او معلولینو چارو وزارت په تېره یوه میاشت کې (۲۴۷۷) تنو معلولینو باندې ویلچرونه وېشلي دي
د شهیدانو او معلولینو چارو وزارت د ټولنیزو خدمتونو د تنظیم ریاست د معلولینو د ښه ملاتړ، د هغوی لاسنیوي او په ورځني ژوند کې هغوی ته د تګ راتګ اسانتیاوو رامنځته کولو په موخه، د یوې خیریه مؤسسې په مالي ملاتړ د تېرې یوې میاشتې په ترڅ کې (۲۴۷۷) تنو معلولینو ته په مرکز او ولایتونو کې ویلچرونه وېشلي چې په ترتیب سره (۲۴۰۲) تنو معلولینو ساده ویلچرونه او (۷۵) تنو نورو ته بیا برېښنایي ویلچرونه ويشل شوي.
سر بېره پر دې، معلولینو ته د لارې کرایې په موخه، یو اندازه نغدي مرستې هم په پام کې نیول شوې وې، چې د ویلچرونو د وېش پر مهال پر مستحقو معلولینو په عادلانه ډول وېشل شوې.
د دغو ویلچرونو په ترلاسه کولو سره د معلولینو د ورځني ژوند ډېرې ستونزې تر یوه حده کمې شوي. هغوی اوس کولای شي په اسانه تګ راتګ وکړي او د نورو کسانو مرستې ته یې اړتیا کمه شوي. دغه ویلچرونه به له هغوی سره مرسته وکړي چې خپلې ورځنۍ چارې په نسبتاً خپلواک ډول ترسره کړي.
همداراز، هغو مستحقو معلولینو چې ویلچرونه او نغدي مرستې یې ترلاسه کړې، د شهیدانو او معلولینو چارو وزارت او د خیریه مؤسسې له دې اقدام څخه یې خوښي څرګنده کړي. هغوی د دغو مرستو له امله مننه کړي چې یادې مرستې د دوی د تګ راتګ ستونزې راکمې کړي او په ورځني ژوند کې ورته اسانتیاوې برابرې شوي.
