په ننګرهار ولایت کې (۵۸۳) تنه یتیمان او بېوزله کسان د حرفوي زده کړو څخه فارغ شول
د ننګرهار ولایت د شهیدانو او معلولینو چارو ریاست د HHRD خیریه مؤسسې په همکارۍ په دې ولايت کې (٥٨٣) تنو مستحقو یتیمانو او اړمنو کسانو ته د کمپيوټر، موبايل ترميم او همداراز د خیاطۍ او انګليسي ژبې زده کړې روزنیز پروګرامونه په لاره اچولي وو، چې د روزنیزې دورې له بشپړولو وروسته د یوې پرتمینې غونډې په ترڅ کې هغوی ته د فراغت سندونه ورکړل شول.
په همدې موخه جوړ شوي پروګرام کې د ننګرهار ولایت د شهيدانو او معلولينو چارو رئيس محترم محمد صابر ځواک، د ولايت مقام مشاور محترم مولوي هدایت الله بریالي، د امر بالمعروف او نهي عن المنکر رئیس محترم مولوي زاهدالله وفا، د اقتصاد، پوهنې رياستونو استازو او يو شمېر نورو مسؤلينو ګډون درلود.
د یادې غونډې په ترڅ کې د ننګرهار ولایت د شهيدانو او معلولينو چارو رئيس محترم محمد صابر ځواک د یادې مؤسسې د هلو ځلو څخه د مننې ترڅنګ د ورته پروګرامونو د دایرولو غوښتنه وکړه.
د یادونې وړ ده، چې د پروګرام په پای کې فارغ شویو کسانو ته د حرفو اړوند ابزار او وسایل هم ورکړل شو.
