د شهیدانو او معلولینو چارو وزارت مستحقو معلولینو ته د ویلچرونو د چمتو کولو په موخه د دارالصدقه خیریه بنسټ سره هوکړه لیک لاسلیک کړ
یاد هوکړه لیک چې د شهیدانو او معلولینو چارو وزارت د بهرنېو اړیکو او پلان رئیس محترم ملا صدو خان حق شناس او د دارالصدقه خیریه بنسټ د رئیس محترم جمشید ایوبي ترمنځ لاسلیک شو چې د هغې پر بنسټ به په لوګر ولایت کې دوه سوه (۲۰۰) تنو معلولینو ته ویلچرونه وویشل شي.
د یاد هوکړه لیک د لاسلیک پر مهال د شهیدانو او معلولینو چارو وزارت د بهرنېو اړیکو او پلان رئیس محترم ملا صدو خان حق شناس د دارالصدقه خیریه بنسټ څخه مننه وکړه چې د دې اړمن قشر (یتیمانو، کونډو او معلولینو) لاسنيوی کوي، په ورته وخت کې د یاد خیریه بنسټ رئیس محترم جمشید ایوبي یاد قشر ته د مرستو د چمتو کولو په برخه کې د پوره همکارۍ ډاډ ورکړ.
د دې پروژې ټوليز ارزښت یو میلیون او شپږ لکه او څلور څلویښت زره (۱۶۴۴۰۰۰) افغانۍ دی چې په لوګر ولایت کې به تطبیق شي.
د يادونې وړ ده چې تر دې وړاندې هم نوموړي خیریه بنسټ یتیمانو او کونډو ته د خوراکي توکو مرستې او معلولینو ته ویلچرونه ویشلي دي.
