د شهیدانو ورثې او معلولیت لرونکو وکړو ته باید پاملرنه زیاته شي
د شهیدانو ورثې او معلولیت لرونکو وکړو ته باید پاملرنه زیاته شي
د شهیدانو او معلولینو په چارو کې د دولت وزیر ښاغلي لعل الدین آریوبي په داسې حال کې، چې د نظامي شهیدانو او معلولینو چارو مرستیالې صبرۍ اندړ او د وزارت ویاند ضیاالحق فضلي یې ملتیا کوله، د ولسي جرګې لومړي مرستیال ښاغلي محمد میرزا کټوازي سره وکتل.
ښاغلي آریوبي په تېر څه باندې یو کال کې د وزارت د ترسره کړو فعالیتونو، اصلاحاتو، سیستم جوړونې او فساد سره د مبارزې په اړه معلومات وړانده کړه وویل، چې د معلولیت لرونکو وګړو او د شهیدانو ورثې د حقوقو ورکړې تر څنګ د دوی د ژوند د ښه والي په موخه مختلفو برخو کې بنسټیز کارونه ترسره شوي، چې پایله به یې په منځمهال او اوږدمهال کې محسوسه او د حساب وړ وي. ښاغلي آریوبي د وزارت د خپلواکه کېدو په برخه کې د ولس د استازو د هر اړخیز ملاتړ غوښتنه هم وکړه.
ښاغلي کټوازي یاد وزارت د معلولیت لرونکو وګړو او د شهیدانو ورثې د ملاتړ لپاره مهم وباله، ترسره شوي فعالیتونه یې وستایل او د نورې پراختیا هیله یې هم څرګنده کړه. ښاغلي کټوازي وویل، چې معلولین او د شهیدانو وارثین د ټولنې ستر او مهم قشر دی، باید زیاته پاملرنه ورته وشي. نوموړي همدارنګه د وزارت د خپلواکه کېدو په اړه هم مثبت نظر وړاندې کړ او دا یې د یاد قشر بنسټیز حق وګڼه، زیاته یې کړه، چې یو خپلواک بودیجوي واحد د دوی د ستونزو د حل او رسیدګي په برخه کې اغېزناک ثابتېدای شي.
