د شهیدانو او معلولینو چارو وزارت یتیمانو او معلولینو لپاره د حرفوي زده کړو روزنیز پروګرام پیل کړ
د شهیدانو او معلولینو چارو وزارت د بیوزلو یتیمانواو معلولیت لرونکو وګړو لپاره د خیاطي او موبایل ترمیم په برخه کې څلور میاشتنې روزنیز پروګرام پیل کړل.
د دې روزنیز پروګرام په پرانیست غونډه کې د شهیدانو او معلولینو چارو وزارت سرپرست وزیر ښاغلي ملا عبدالمجید آخند، د یاد وزارت د دفتر رئیس قاري شاه محمد دوست، د دعوت او ارشاد رئیس مفتي عبدالاحد مسعود، د مالي او حسابي چارو رئیس قاري محمد امین درویش، د فلجیانو او لاوارثه یتیمانو د پالنې مرکز رئیس مولوي روح الله، د یاد وزارت د اطلاعاتو او عامه اړیکو مسؤل مفتي فیصل خاموش او د کابل ولایت د شهیدانو او معلولینو چارو رئیس قاري شمس الامین ظهیر هم ګډون درلود.
په دې پرانیست غونډه کې د شهیدانو او معلولینو چارو وزارت سرپرست وزیرملا عبدالمجید اخند یادو یتیمانو او معلولینو ته دا روزنیز پروګرام اړین وباله او هغوی ته یې د ژوند په ټولو چارو کې د بریالیتوب هیله څرګنده کړه.
په دې غونډه کې د شهیدانو او معلولینوچارو وزارت د دفتر رئیس قاري شاه محمد دوست د یاد وزارت د لاسته راوړنو په هکله خبرې وکړې او ویې ویل: په ۱۴۰۱ لمریز کال کې د یتیمانو او معلولینو د تثبیت لړۍ روانه ده چې په دې لړ کې له (۱۳۵) زرو څخه زیات معلولیت لرونکي وګړي ثبت شوي دي او همدارنګه په ټول هیواد کې د (۴۰۰) زرو په شاوخوا کې یتیمان هم ثبت شوي دي او د یتیمانو د تثبیت لړۍ روانه ده او امکان لري چې د تثبیت په صورت کې د یتیمانو دا شمېره نوره هم لوړه شي.
نوموړي همداراز زیاته کړه: د شهیدانو او معلولینو چارو وزارت د طرحې سره سم نږدې اویا سلنه معلولینو او یتیمانو ته د روان کال د شپږو میاشتو حقوق ورکړل شوي دي.
په دې غونډه کې د شهیدانو او معلولینو چارو وزارت د دعوت او ارشاد رئیس مفتي عبدالاحد مسعود هم یتیمانو او معلولینو ته یاد روزنیز ورکشاپ د جوړونې هرکلې وکړ او ویې ویل: باید ځوانان له خپلو استعدادونو څخه په پوره توګه د هېواد د آبادي په برخه کار واخلي.
په دې پرانیست غونډه کې د حرفوي زده کړو آمر انجینر خالد فاروقي د یتیمانو او معلولینو لپاره د حرفوي زده کړو په هکله معلومات وړاندې کړل او زیاته یې کړه: په ۱۴۰۱ کال کې د شهیدانو او معلولینو چارو وزارت له خوا شپږ روزنیزې حرفې په پام کې نیول شوې وې چې له هغې جملې څخه یتیمانو او معلولینو ته د حرفوي زدکړو په موخه د (خیاطي او د مبایل ترمیم) په دوو برخو کې فعالیت پیل کړل شو، او په پام کې ده چې د څلور نورو حرفو د زدکړو زمینه به هم برابره شي.
نوموړي ژمنه وکړه چې د حرفوي زدکړو د پروګرام په پای کې به فارغ شوي کسانو ته د کار زمینه برابره کړي.
