د سولې په پروسه کې دې د جګړې قربانیانو غږ واوريدل شي
د سولې په پروسه کې دې د جګړې قربانیانو غږ واوريدل شي
نن چهارشنبه د وري په ۲۵مه، د شهيدانو او معلولينو چارو سرپرست وزير پوهنمل حميدالله فاروقي، د ملي پخلاينې عالي شورا مرستيالې زهرې مطهر احمدزۍ، د بشري حقونو خپلواک کميسيون کميشنرې بنفشه یعقوبي، د بشر حقونو سازمان رئيس او د شهيدانو ورثې او معلولينو استازو، په سیپیدار ماڼۍ کې د سولې په هکله د جګړې قربانيانو د نظرونو اخيستلو ناسته کې ګډون وکړ او د سولې په تړاو يې خپل نظرونه، غوښتنې او وړانديزونه ور سره شريک کړل.
په پيل کې، د ملي پخلاینې عالي شورا مرستیالې آغلې زهرې مطهر احمدزۍ خبرې وکړې او د سولې پروسه کې يې د جګړې قربانیانو استازو پر ګډون ټينګار وکړ.
همدا راز اغلې احمدزۍ د جګړې پای د افغانستان د خلکو اتحاد او پيوستون پورې تړلی وګاڼه او پر ټولو افغانانو یې غږ وکړ، چې په يو ټغر را ټول شي او د جګړې پای ته رسولو لپاره په ګډه کار وکړي.
ورپسې د شهيدانو او معلولينو چارو سرپرست وزير پوهنمل حميدالله فاروقي خبرې وکړې. روانه جګړه يې ناروا او تحميلي وګڼله او دوام يې د منلو وړ ونه باله.
ښاغلي فاروقي څرګنده کړه، چې د افغانستان خلکو د جنګ له امله سترې قربانۍ ورکړې دي او نور د جنګ له دوام څخه ستړي شوي دي. اوس اړتیا ده چې له واقعي فرصتونو څخه په ریښتیني توګه د تلپاتې او عادلانه سولې لپاره ګټه واخيستل شي.
ښاغلي فاروقي د سولې په پروسه کې د جګړې د قربانيانو رول کمرنګه وښوده او ټینګار یې وکړ، چې په دې برخه کې بايد د جګړې د قربانیانو غږ واوريدل شي.
هغه زیاته کړه، چې هغه سوله چې د خلکو په ارادې او غوښتنو پر بنسټ رامنځته کېږي، په هغې کې د ټولو افغانانو عزت، خپلواکي، یووالی او سرلوړي نغښتي دي.
همدارنګه نوموړي په افغانستان کې د سولې په اړه د ملي او نړیوالې اجماع رامینځته کيدو ته اشاره وکړه او هیله یې څرګنده کړه، چې نوره دا روانه جګړه پای ته ورسیږي او نور هېڅ افغان د جنګ قرباني نه شي.
د هغه په وينا، چې سوله د ټولو افغانانو غوښتنه ده او په دې تړاو يې د افغان دولت او متحدينو له هڅو هم ستاينه وکړه.
د ناستې په اوږدو کې د بشري حقونو خپلواک کمیسیون کمیشنرې بنفشې یعقوبي د جګړې قربانیانو پر وړاندې د پرتو ستونزو او ننګونو يادونه وکړه او زياته يې کړه، چې د جګړې د قربانیانو، د شهیدانو وارثینو او معلوليت لرونکو وګړو پر وړاندې زموږ نظر بايد د واقعیتونو پر بنسټ وي؛ نه د ترحم او مهربانۍ له مخې.
د هغې په خبره، چې د ټولنې ياد قشر مظلوم او بې ځواکه نه دی؛ بلکه د يو لړ محدودیتونو لرونکی دی.
په پای کې د جنګ قربانيانو استازي د شته ستونزو او ننګونو بیانولو تر څنګ، د سولې په پروسه کې د خپلو نظرونو، مشورو او وړانديزونو د اوريدلو غوښتونکي شول.
