د شهیدانو د ورثې او معلولینو ګډون به د سولې بهیر نور هم پیاوړی کړي
د شهیدانو د ورثې او معلولینو ګډون به د سولې بهیر نور هم پیاوړی کړي
د شهیدانو او معلولینو چارو سرپرست وزیر پوهنمل حمید الله فاروقي په ولایتي کچه د سولې بهیر کې د شهیدانو د ورثې او د معلولینو ټاکل شوو استازو سره وکتل.
ښاغلي فاروقي، د شهیدانو ورثې او معلولینو د سولې بهیر، جګړې درېدو او د جګړې قربانیانو ستونزو، غوښتنو او وړاندیزونو ته د رسېدنې په اړه خبرې وکړې.
د افغانستان د معلولینو سرتاسري شورا رییس مسعود صافي د سولې بهیر کې د معلولینو او د شهیدانو ورثې د شمولیت له کبله د شهیدانو او معلولینو چارو وزارت رهبرۍ له هلو ځلو، د سولې په چارو کې د دولت وزارت او د ملي روغې جوړې عالي شورا مشرتابه څخه مننه وکړه او په دغه سرنوشت ټاکوونکي بهیر کې یې د جګړې د قربانیانو شمولیت او د رڼو ټاکنو له لارې په ولایتونو کې د سولې د استازو په توګه د معلولینو ټاکنه مهم اقدام وګڼه.
د یادې شورا ځینو نورو استازو، چې له مختلفو ولایتونو یې تشریف راوړی و، په خپلو خبرو کې د سولې بهیر مهم وباله او د شهیدانو ورثې او معلولینو شمولیت یې یوه ضروري اړتیا یاده کړه. دوی همدا راز د ستونزو د حل په موخه خپل وړاندیزونه او غوښتنې هم د وزارت رهبرۍ شریکې کړې. د اقتصادي ستونزو حل، تعلیمي او کاري فرصتونو پر رامنځته کېدو یې د تاکید تر څنګ د سولې په خبرو اترو کې د ترلاسه شوو فرصتونو، لاسته راوړنو او پرمختګونو په ساتنه هم ټینګار وکړ.
د شهیدانو او معلولینو چارو سرپرست پوهنمل حمید الله فاروقي د یادې شورا د رهبرۍ او استازو له راتګه مننه وکړه او د سولې بهیر کې د ولسونو له لوري د دوی د استازو د ټاکل کېدو له کبله یې مبارکي ورکړه. د سولې بهیر کې یې د شهیدانو د ورثې او معلولینو ګډون مهم وباله او د دغه قشر ستونزو ته د رسېدنې په موخه یې د وزارت نوي پلانونه او پرمختګونه د غونډې کډونوالو سره شریک کړل.
ښاغلي فاروقي هېواد او ولس ته د جګړې پر زیانونو او د سولې پر اړتیا او ارزښت هم هر اړخیزې خبرې وکړې وویل، چې په روانو مذاکراتو کې د شهیدانو د ورثې او معلولینو شتون اړین دی، ځکه د جګړې اصلي قربانیان همدوی دي؛ باید نظرونه او وړاندیزونه یې واخیستل شي.
