د شهیدانو او معلولینو چارو وزارت مل پلاوي په کندهار ولایت کې د دغه وزارت له اړوند ریاست څخه ارزونه وکړه
د شهیدانو او معلولینو چارو وزارت د مالي او اداري چارو عمومي رئیس ښاغلي مولوي کلیم الله افغان د با صلاحیته پلاوي په ملتیا د کندهار ولایت د شهیدانو او معلولینو چارو ریاست د کاري بهیر او د خدمتونو د وړاندې کولو څرنګوالې وڅیړه او د یاد ریاست د کار او فعالیتونو د لا ښه والي په موخه یې لازمې لارښوونې ورکړې.
په دې ارزونه کې د شهیدانو او معلولینو چارو وزارت د مالي او اداري چارو عمومي رئیس ښاغلي مولوي کلیم الله افغان وویل: ډیر د خوښي او نیکمرغۍ ځای دې چې نن ورځ د هېواد د داخلي عواید څخه ملي بودیجه تمویلیږي او د بودیجې تمویل کوم هیواد یا نړیوال سازمان پورې تړلي نه دی، نوموړي ټینګار وکړ چې د مالي کال لومړۍ نیمايي پای ته رسیږي، نو یاد ریاست ته ځانګړې شوې بودیجه دې په شفاف او پر وخت یتیمانو او معلولینو ته ورکړل شي.
د کندهار ولایت د شهیدانو او معلولینو چارو رئیس ښاغلي مولوي علاوالدین سعد یاد ریاست ته د ځانګړې شوې بودیجې د مصرف په برخه کې د خپلې ادارې ستونزې او ننګونې په ګوته کړې، په همدې حال کې د شهیدانو او معلولینو چارو وزارت پلاوي په اړوند ریاست کې د شته ستونزو او ننګونو د حل په موخه د کندهار ولایت د والي له مرستیال سره وکتل.
د کندهار ولايت د والي مرستیال ښاغلي الحاج مولوي حيات الله مبارک د شهيدانو او معلولينو چارو وزارت راغلي پلاوي ته ښه راغلاست ووايه او د یاد رياست د ستونزو او ننګونو په حل کي يې د همکارۍ ژمنه وکړه.
باید وویل شي، چې تر دی وړاندې د شهیدانو او معلولینو چارو وزارت پلاوي د اروزګان، فراه او هلمند ولایتونو د وزارت له اړوندو ریاستونو څخه هم ارزونه کړې وه.
څه موده وړاندې یاد پلاوي په یو لړ سفرونو کې د لوګر، پکتيا، خوست، پکتيکا، زابل او غزني ولايتونو له اړوندو رياستونو څخه ليدنه او ارزونه کړې وه، او د يادو رياستونو د بودیجې د مصرفولو پر وړاندې شته ستونزې او ننګونې یې له منځه وړې دي.
