د شهیدانو او معلولینو چارو وزارت له کارکوونکو څخه ازموینه واخیستل شوه
د شهیدانو او معلولینو چارو وزارت د دعوت او ارشاد ریاست د کارکوونکو د دیني پوهاوي د لوړولو او د اسلامي احکامو او ارزښتونو په اړه د هغوی د معلوماتو د پیاوړتیا په موخه منظم تدریسي پروګرام پیل کړی دی، د یاد پروګرام له مخې، هر سهار شاوخوا دېرش دقیقې کارکوونکو ته د دیني مسائلو په بېلابېلو برخو کې زده کړې وړاندې کېږي. په دې لړ کې ګډونوالو ته د عقیدوي او فقهي مسائلو ترڅنګ د سیرت النبي صلی الله علیه وسلم په اړه هم لازم او ګټور معلومات تدریس کېږي، څو کارکوونکي د خپلو ورځنیو چارو ترڅنګ، له دیني مسائلو سره لا زیات اشنا شي.
نن د ګډونوالو د دیني معلوماتو د معلومولو او د تدریس شویو موضوعاتو د ارزونې په موخه ازموینه واخیستل شوه.
د ازموینې د اخېستو پر مهال د شهیدانو او معلولینو چارو وزارت د دعوت او ارشاد رئیس محترم مفتي عبدالاحد مسعود او د دغه ریاست یو شمېر کارکوونکو حضور درلود او د ازموینې بهیر یې له نږدې وڅاره.
یاده ازموینه د کارکوونکو د لیک او لوست د وړتیا له مخې په دوو برخو کې ترسره شوه، هغو کارکوونکو چې د لیک او لوست وړتیا یې لرله، ازموینه یې په تحریري بڼه ورکړه او له هغو خدماتي کارکوونکو څخه چې په لیک او لوست نه پوهېدل، ازموینه په شفاهي (تقریري) ډول واخیستل شوه.
