د شهیدانو او معلولینو چارو وزارت له سرپرست سره د معلولیت لرونکو اشخاصو د ملي فدراسیون تخنیکي کمیټې غړو لیدنه
د معلولیت لرونکو اشخاصو ملي فدراسیون تخنیکي کمیټې غړو د شهیدانو او معلولینو چارو وزارت سرپرست او نوماند وزیر پوهنمل حمیدالله فاروقي سره د شهیدانو او معلولینو په چارو کې د ولسمشر سلاکار عمرا خان منیب په حضور کې وکتل، په دې لیدنه کې د ګډې همغږۍ په څرنګوالي خبرې وکړې.
په پیل کې، د تخنیکي کمیټې غړو د معلولیت لرونکو اشخاصو ملي فدراسیون په جوړولو کې د فعالیتونو او پرمختګونو په اړه خبرې وکړې او په دې برخه کې یې شته ننګونې او ستونزې د وزارت له مقام سره شریکې کړې.
د شهیدانو او معلولینو چارو سرپرست وزیر ښاغلي پوهنمل حمیدالله فاروقي د یادې کمیټې له هڅو او کړنو څخه مننه وکړه، او زیاته یې کړه چې د ملي فدراسیون جوړیدل یوه ملي اړتیا ده او فدراسیون کولی شي چې د معلولیت لرونکو وګړو لپاره د رسیدګۍ او د هغوی د حقوقو د غوښتلو په موخه بنسټیز رول ولوبوي.
په دې لیدنه کې د شهیدانو او معلولینو چارو وزارت سرپرست د دې وزارت له اړخه د همکارۍ ډاډ ورکړ او د دې کمیټې د فعالیتونو پر ګړندیتوب یې ټینګار وکړ.
د شهیدانو او معلولینو په چارو کې د ولسمشر سلاکار ښاغلي عمرا خان منیب د معلولینو پر وړاندې له شته ستونزو څخه یادونه وکړه او زیاته یې کړه "د فدراسیون ټول تخنیکي کارونه نهایی کیږي او موږ هڅه کوو د خپلو فعالیتونو ښه کولو لپاره د فدراسیون اجماع پیاوړې کړو ، او اوس یوه نسبي اجماع تر لاسه شوې ده.
