د سولې اړوند چارو کې د معلولیت لرونکو وګړو ګډون مهم دی
د سولې اړوند چارو کې د معلولیت لرونکو وګړو ګډون مهم دی
د شهیدانو او معلولینو په چارو کې د جمهور رییس سلاکار ښاغلي عمرا خان منیب د شهیدانو او معلولینو په چارو کې د دولت وزیر ښاغلي لعل الدین آریوبي سره وکتل.
ښاغلي منیب د سولې په برخه کې د معلولیت لرونکو وګړو د ځای او ګډون، ګمارنې او د قوانینو د تعدیل په اړه خبرې وکړې وویل، چې معلولیت لرونکي وګړو ته باید د سولې اړوند مسایلو کې پام وشي، همدارنګه په دولتي ادارو کې د مشاورینو په توګه د معلولینو د ګمارنې چارې چټکې او د قوانینو د تعدیل موضوع هم ته پاملرنه زیاته شي.
ښاغلي آریوبي یاد موارد مهم وګڼل وویل، چې د سولې په پروسه کې د معلولینو د ځای او ګډون په اړه به اړوندو ادارو سره خبرې وکړي، تر څو معلولینو ته خپل حق ورسیږي. ښاغلي آریوبي په دولتي ادارو کې د معلولینو د ګمارنې په اړه څرګنده کړه، چې د جمهور رییس په دې اړه د اداري اصلاحاتو او ملکي خدمتونو خپلواکې ادارې ته د تطبیق لارښوونه کړې ده. ښاغلي آریوبي زیاته کړه، چې د قانون مسوده تر کار لاندې دی او تمه شته چې مثبت بدلونونه پکې رامنځته شي.
ښاغلي آریوبي د معلولیت لرونکو وګړو د ژوند په اقتصادي اړخ هم خبرې وکړې وویل، چې د معلولینو ځان بسیاینه او اقتصادي ملاتړ مهم او لومړیتوب دی.
