د شهیدانو او معلولینو چارو سرپرست وزیر د وزارت مسولینو او کارکوونکو سره تعرفي لیدنه وکړه
د شهیدانو او معلولینو چارو سرپرست وزیر د وزارت مسولینو او کارکوونکو سره تعرفي لیدنه وکړه
نن چهارشنبه د (سلواغی میاشتې ۸ نېټه) د شهیدانو او معلولینو چارو سرپرست ښاغلي پوهنمل حمیدالله فاروقي د وزارت مرستیالانو، رئيسانو، مشاورینو او کارکوونکو سره وکتل؛ د غوره همغږۍ د را منځته کولو پر څرنګوالي او پر وخت د خدمتونو ترسره کولو په اړه يې خبرې وکړې.
ښاغلي فاروقي لومړی د وزارت د اړتیاوو، ستونزو، خنډونو او شته سرچینو په اړه خبرې وکړې او وویل: د ښو او غوره خدمتونو وړاندې کولو لپاره اړینه ده، چې یوه منظمه، اغېزناکه او ځواب ویوونکې اداره ولرو؛ څو د شهیدانو ورثې او معلولیت لرونکو وګړو پر وړاندې د شته ننګونو سره مقابله وکړو.
ښاغلي فاروقي د حساب ورکوونکې او همغږې ادارې د رامنځته کولو لپاره په مشترکو هڅو او همکارۍ ټینګار وکړ.
ښاغلي فاروقي څرګنده کړه، چې د قانوني مسؤلیتونو سربېره ټول باید د شهیدانو وارثینو او معلولینو پر وړاندې خپل انساني او ملي مسؤلیتونه ادا کړو او د شهیدانو ورثې او معلولینو لپاره د هېواد د نورو وګړو په څېر د عزت او عدالت پلوه ژوند لپاره زمينه برابرول مو ګډ مسوليت دی.
د شهیدانو او معلولینو چارو سرپرست وزیر د حساب ورکول، د مسؤلیتونو ترسره کول، د روڼتيا ټينګښت، د قانون سره سم د چارو بشپړولو په اړه ګډونوالو سره خپلې نظرونه شريک او زياته يې کړه، چې د اصلاحاتو راوستلو او د اغېزناکو خدمتونو وړاندې کولو په برخه کې به په پوره ژمنتيا کار کوو، څو د قناعت وړ پايلې ترلاسه شي.
د ناستې ګډونوالو هم د چارو د ښه والي په موخه خپلې ستونزې او وړاندیزونه د وزارت مشرتابه سره شریک کړل او په دې برخه کې يې د هر اړخيزو همکاريو ډاډ ورکړ.
